خليك مكانك/ما تحاولش الهرب/ وما تفتكرش الليل هيخبيك منى/ مادام لمحتك خلاص خلصت اللعبة/ اقعد هنا/وما تنساش انك خسران ..واما نخبط فى بعض /هتتوجع انت اكتر /لاننا بدلنا الأدوار /وبقيت انت الأجمل/والاجبن والأضعف/والحساس/ وانا دورى امنع عنك /اى حلم انتهت صلاحيته /لان الضحك من غير روح خيانة.
وفى القصائد كلها يتحرك محمد خير فى غرفته ،يتجول بين كل مشاعره ويحولها إلى كائنات حية يستحضرها ويجرى معها حوارات بديعة ، ففى قصيدة (خوفك ) يستحضر الخوف الذى يسكنه ويسكننا جميعاً :
خوفك .. ما اقدرش غير عليك / اتغذى على كل احاسيسك / وقعد لوحده متربع فى قلبك / وانت/ باين عليك مرتاح كده/لدرجة انك نسيت مكان الباب/واقف ورا الشباك كأنك شبح/ كأنك خيال /ما بقاش يخوف حد.
على أن أجمل ما فى الديوان هى تلك اللحظات التى اتخيله فيها يطل من نافذته ليتأمل العالم وفجأة تسقط عيناه على مشهد نادر لعصفور يعيش أخر لحظاته قبل أن يسقط :بعد لفة طويلة كالعاد /العصفورين نزلوا ع السلك الغلط/الكهربا صرخت/ونورت الطريق لمدة ثانيتين /الريش نزل فتافيت /نول/جمرات/ بتلالى فى العتمة.
ولأن الديوان كما قلت أغنية واحدة طويلة متنوعة الألحان فإن أخر قصيدة كانت أحلى ختام بداية من عنوانها (للعبرة)،أما موضوعها فهو وقائع مصرع سيجارة .. نعم سيجارة :السيجارة الوحيدة /اتفرمت فى العلبة من غير قصد/من غير ذنب/ ما حدش شافها/ولا حد عرف أصلاً /اناها كانت موجودة هناك /اتهمشت بسهولة وبدون مشاعر.. سيجارة لا عاشت ولا ماتت زى طفل حرام .. ما لحقتش تتنفس ولا تترعب /من جهنم المحبوسة فى الولاعة /ولا جربت شهوة الشفايف /فى برد الصبح /وما حدش هيتحاسب على قتلها .. هتنتهى تماما /زى مأساة مخجلة /زى أى حد /إتوجد فى اللحظة الغلط.
شوفتوا الجمال بتاع محمد خير ؟
