من رباعيات الزمن البخيل

رجائي الميرغني
Share on facebook
فيسبوك
Share on twitter
تويتر
Share on whatsapp
واتس أب
Share on telegram
تيليجرام

رجائي الميرغني

29\4\2016
مُدمن تَفاؤل أنا فى الشِـدّه والأَزمات
أَفتح كتاب الزمن واطالع الإشـارات
يِظهرلعينى ضَىّ من حالك الظُلمات
أَشهد بإن الجَاىّ أجمل من اللى فـات
**
27\2\201
بين الفَشـل والنَجـاح جِسر مَمـدُود وظاهر
وخَطاوى من غير دَلِيل، وخَطاوى بِتعَافر
بين المُتاح والبَـرَاح .. هُـوَّه مَا بين جَبَلِين
وخَلق خَايفه لَتِخسَر وخَلق تِهوَى المَخاطر
**
29\4\2020
عَليل بَقاله سنيـن .. ودَوَاه نَسايم الحُـرّيه
يا خَلـق يا هُـوه إلحَقـوه بِالوَصفَه المِداويّـه
رُفَقَاتـه غابـو ورِجعُوله بِبَديـل إصطناعـى
مَفِيش طبيعى؟ قالو: بتصريح من الداخليه
**
18\5\ 2016
طلِّيت على خــط العَـدم .. رأيـت بشــر ياما
سألت ميـن دول .. وليـه باصينلى بِجهامه؟
قالوا: إحنا المنسيين المقهورين المجهوليـن
وعَلَى بال مَا تِفتِكرونا .. تِكُون قامت القيامه
**
26\3\2020
القَطْر راجع بضهره والمسافرين بيسَقَفوا
قاطعين تذاكر ذهاب .. رَمُوها وإتستفوا
القطر خطّى القضيب، وإتخطى المحطات
يا ساده ياركّاب: رايحين على فين؟ مش تعرفوا؟
**
6\8\2015
العقل مِتعَطّل .. فيه حاجه قاطعه عنه الحراره
السلك مِتوصل .. طب مش يبيّن أماره
جابوا الخبير قال: ده مش عُطل فنى
إنما حالة تسمم بأفكار من قبل ميلاد الحضاره
****
21\2\2016
العصا للعاصى .. واللى يِخالف السلطان
ولو وَصَلِت لإيد المُعتَدى عليه .. يُدان
سألوها: ليه بنت الشجر إختارت العدوان؟
قالت: فَطَمُونى بدرى، وسَقونى مَيّة شِيطان
***
29 \1\ 2016
فى يوم تَمنيت نِلغى اللون اللَحْمَر القانى
لون الدمِ المسفوك بلا معنى فى أوطانى
زَعَّلت منى الورود والفساتين والشفايف
ويا ويلى لو كانت جَهنم الحمرا سَمعَانى
**
8\2\ 2020
لو كلمة الحق بتِنقال فى العلن زى الدِرا
لَكَان يبقى فيه غش فى البيع ولا فى الشرا
ولَكَان جنس حاكم عمل حساب للمحكومين
ولَا قاللُهم: واخدكم لِقُدام .. وهوَّ بيِرَجّعهم ورا
***
3\2\2016
أهلاً بأحلام الشباب .. وإن قالوا مجنونه
بلد بلا حلم، لا هيّا عايشه ولا هيّا مدفونه
وشباب بيرموا أحلامه فى سلة المهملات
يِفضَلّه إيه غير كابوس وغُربه ورعُونه؟
***
18\12\2020
ليه العيون البصيره غَفلانه ومش بِتطُل
على الطفوله الجَريحه المِلَقَحه فى الطّل؟
وإزاى تِغَنوا لوطن ونهش لحمه مُباح؟
وكام حكومه تولّت .. وقالت إنّها للكل؟
**
14\12\2020 ·
ضَمّة أيادى عديده .. وإيد وحيده هزيله
الضمّه نالت مُرادها، واليَد ما بإيدها حيله
دَرْس القراءه إتنسى وإنشال من المنهج
الفرد لسّاه مُهَدد .. والجَمع أصبح رزيله
***
13\11\2015
يامجَبَّرَاتى العِظام إفتينا بالرأى الأمين
ينفع تِدَاوى وطن مشروخ بقاله سنين
وإن خد خطوه قدّام يِرجَع ويحدف يمين؟
ولو مش هينفع .. شُور علينا نروح لمين؟
***
11\9\2015
قول يا مولانا قول لا فُض فُوك
وافتى بحكم الشرع لِلّى بيسألوك
وإتفضل علينا بالرأى فى الناس
اللى بتمشى على دين الملوك
***
23\7\2015
أنـا غِـبت مَرّه عـن الوجــود .. ثـم عُـدت
قالولى: إِحكِيلنَـا إيـه اللى شُفته لمّا غِبـت؟
جَاوبت: مـا يشُوف العَـدم إلا أهــل العَـدم
وأنا دَخَلت بِرجل واحده، سَحَبتَها لَمّا فُقت
****
21\7\2017
قالوا بقالنا دستور هنباهى بيه العصور
ضامن جميع الحقوق، وظابط كل الأمُور
ولما جاله وقت عوزه.. كَفُوا عليه ماجور
لا قالوا إيه السبب.. ولا سَبَكوا ليه الدور !
****
31\12\2016
عام إِنقضى وبِيوَدَّع، رُوح إلَهِـى لا يسِيئك
لا شُفت فِيـك الســلام .. وكَويتنـى بِلَهِيبَــك
لَو كَان يِفِيد العِتاب، كُنت عَاتبت اللى قَبلك
ولو كنت ضامن خَليفتك، لَسْكِت عن عِيبك
****
9\5\2016
للبيع: فَقر من الدَكر .. وقَهر مَالُه نظير
وميت ألف طـن من التَعَصُب والتكفيـر
إنتـاج محلى زاد عن حاجة المُستَهلِك
قامـت الحكومـه مِعَبِيـاهم .. للتصديـر
*****
14\1\2017
مِعَدِّى يـوم على القلعـه، حَسِيت بِجسمى مِقَشعَـر
قريت فى سِرى آيتيـن يِحمُونى من شَـر المِقـدَّر
لا حِزِنت ع المماليك ولا كنت خايف من الوالى
لَكِنّى شُفت بخيالى خوازيـق مِتخَزِّنه، لِلى بِيّفَكَّر
*****
22\3\2016
كل الكلام إنحنى أول ما جَت سِيرتِك
أنا الوليد اللى فتّح عينيه على صورتِك
وأنا الرَجِيل اليتيم من بعد ما عدِمتِك
وهَفضل مَدين ليكى لحد ما انام نومتِك
****
16\11\2018
مَفيش فَقر مِتمَكِّن كَان لُه سَبب مَقبُول
ولَا غِنَى إتحَكِّـم إلا أما شَرحُه يِطُـول
الفقر مات مِ الفقر ومن إنتظِـار الغِنَى
لِحَد مّا يِفَكَّر .. يِوَزّع الثَروه بِالمَعقُول
****
27 \9\2018
رَاح يِشكِى لِلبَاشوَات عَمايِل البَاشوَات
الجُمعه خَال السبت، والحَد عَم التلات
وِالتُهمه جَاهزه لِلى يِحُك فى المَقامات
تِبَات نَزِيل السِجن وَلَّا تِقضِّيها سُكات؟
****
1\5\2018
رِيحِة فُلوسَك عَرق يا صَاحب الرِسمَـال
ثَمرة كِفاح حضرِتك .. ولّا شَقـا العُمَّال؟
إن قلت شُرَكَا، ليه كفَّه تِعلا وكَفَّه تِغطَس
وضَفَّه مَجنُونَه بِمالها وضَفَّه فى الأَوحَال
**
9\11\2015 ·
وَصَلت كلمه بكلمه ما ارتاحوش لبعض
فصلت بينهم بكلمه .. نزلوا فيها عَض
حطيت بَدالها نُقطتين .. حصل الوفاق
.. بس المعنى فى الجُمله اعترض
****
21\21\2015
بدأت أقرا الجرايد من لمّا كانت بقرش
وكانوا يعتبروها صاحبة جلاله وعَرش
نط الزمن بالسعر لجنيهين وده لإن
الصحافه بَقت مطلوبه ف اللف والفَرش
****
23\7\2016 ·
أنـا غِـبت مَرّه عـن الوجــود .. ثـم عُـدت
قالولى: إِحكِيلنَـا إيـه اللى شُفته لمّا غِبـت؟
جَاوبت: مـا يشُوف العَـدم إلا أهــل العَـدم
وأنا دَخَلت بِرجل واحده، سَحَبتَها لَمّا فُقت
****
14\4\2016
كِتَاب إنحَشر بين رفوف مكتبه ومَحدِش قَراه
عَدِّت سنيـن لَمّا وِقِـع فى إيـد زبون، وإشتراه
بالليل كل ما يقرا صَفحـه يِتنَهِّـد ويِصرُخ: آه
مِش لـو لِقيتَك بَدرى .. كُنت غَيَّرت الإتجَــاه
*****
22\9\2016
يا بَحـر كُون أَكرَم عليهم من اللى صَدّرهم
وإفـرد حصيـرة أمانـك .. يِمكِـن تِحَصَّنهُـم
وإن عِطلوا بالقـــارب، خَلِّيـك رَحيـم بِيهـم
دول فاتوا أهـل ووطن، مَكَانش يوم دارهم
*****
3\11\2020
سبع سنين متحاصر من تلات جبهات:
حَبسة سِريرُه، والدَوا، وانتظار المعجزات
الحاله مِتلَصّمه، والفكر بيعيد فى السؤال:
ليه البشر بيكرهو الموت .. ويِتحَمّلو المَوات؟
******
10\1\2017 ·
بيقولـوا الأمل فَقـد الأمل فـى أَهـل حِتتِـنا
وعَلّا سُـورُه، وسابنَـا حَيـارى فى عتمتنا
أنا قلت: الأمل جسر بين القلب والمأمُول
والمِتأَخرِين فى العبور إتسَببِوا فى خيبِتنا
****

 

مقالات من نفس القسم

فتحي مهذب
يتبعهم الغاوون
موقع الكتابة

قصيدتان