عارف أيه كمان؟
أنك تدى من غير مقابل بحب ورضا
وف الآخر تنام ودمعه على خدك حيرانة تنزل
طب مين هيشوفها .. حد هيسمعها ؟
مين يستاهل وياترى هيقدر؟
أو تختار أنها تتحاش وتموت مخنوقة أحسن !
عارف أيه ؟
أيه اللى يخليك متاخد أو متاخر عن كل العايشين وياك
ببساطة هى كل الأمراض النفسية
اللى اتربت جواك من طيبتك
أو من خيبتك الاتنين واحد
وأهو بكآبتك ، برازالتك هتعديها
وساعتها هتوهم نفسك وتحّفظها
أن الضحك بيخلى سنانك تستهوى
2
العيشة
لما تكون عايش اللحظة وفجأة تلقاها بتتباع ف موبنيل
لما تقرر تكتب وبسرعة تفنط أحلامك تطلع خسران
لما تتسند على كتف صاحبك وتلقيه كمبليت
عدى الحمولة لعشرة غيرك قرر أنه ما يتخلاش عنهم
ولما أخوك يرفض يستضيفك عنده لما تقرر تهج من بيتك
لما تحدف ألمك على السرير .. ويفز فجأة واقف
لأداء مهمة عارف كويس أنها مش الأخيرة
3
العيشة واللى عايشنها
أما يجيلك خبر موت صحبك وعشرة عمرك فى رسالة موبايل
وفجأة اللى واقف جنبك فى الأتوبيس يطب ساكت
وتتلهى من الفزع وأسئلة ملهاش إجابة
فاكر أن شوية ميه بسكر هترجع له حياته
إتلهى أحسن
4
عيشة والسلام
لما تدور على حته تعيط فيها تتسد فى وشك
واللى تنام فيه تصبح فيه
تنهش فى دماغك طلبات وأوامر وكشوف حسابات عمالة تتجدد ما بتخلصش
ديونك ضلك
والقهر اللى حنى لك ضهرك
والحزن اللى مهما كّحته من على جبينك
لزق لك لزق لك
5
أهى عيشة
تراب على الأسفلت هبه هوا تزيحه
تشرب شايك فى الصبحيه وتتكل
يومك غريب النهاردة بتبتسم للشقا
مش عارف أن ملاك الرحمة فاتح إيده على الآخر
بيلم شبابك اللى إتبعتر بدرى على الأسفلت.
……………
أيوة أنا بنت
من غير حلفان .. من غير ما أتعرى ..
وبصوتى العورة ووشى العورة
أنا بنت
أنا بنى آدم .. لأ أنا بنى آدماية
اذا كان ربنا توجنى .. مين انت عشان تهينى ؟
فى كلامك وجملك ولغتك
ولما اللغة العربية وصفتنى مصيبة وداهية وبلوة وكارثة
جه التاريخ وغصب عن عينك نصفنى
وبقيت أنا ثورة
أيوة أنا تاء مربوطة
مش ماشيه أبدا على حل شعرها
أنا عالمة وأستاذة ومخترعة
فخورة أن أنا مربوطة بجنسى
أنا أمك وأختك ، بنتك ومراتك اللى بتشتهى منها الضنا
وأنا تاء مفتوحة ما تعرفش السكات
أنا الفرات ، والتبات وأنا الفتات وأنا البيوت يعنى السكن
يعنى أنا العااااااالم.. الأكبر منك
اللى يساعك ويطبطب على همك
وباختصار وغصب عنك
أنا الوطن .
……………………..
مساء الخير يا إسعاف
باتعفرت وتجرب منى جنابى تطق
لما بافكر
واما أبقى لوحدى ويصطادنى الهم بتبحلق فيا حيطانى
تتقصع صورى وتمصمص شفايفها
تتصعب على حالى
وأقوم أتخبط فى الكتب،الفرش، اللوحات والجرايد
كل اللى كان بيشغلنى
ينزل فيّه تجريح وربما الإصابات خطيرة
مساء الخير يا إسعاف
مستنيه ذبيح أو جثه
وأنا مستنيه مين أمال؟
دبلت على جبينى القصة اللى ياما اتدلعت واتشخلعت
بين القصص والشنابات
ولا حد قدر يفرق شعرها ، بس قدروا ينعكشوه
لحد ماشاب من كتر الوعود
إنصاب العود
وصلت هشاشة العظام لقمة نخرها
واتمخمضت شوكة الراحة
والفكر راجع .. وبالرااااااحة
طب واقف
………………..
بدل فاقد
معقولة العمر يضيع بالساهل
بدون مقدمات ولا شكوى م الذاكرة
معقوله يضيع … ؟
وماعندناش له صور ولا فيش ؟
ولا فيش براح فى الوقت نعمل بدل فاقد
ونبلغ عن مين .. ونشك فى مين سرقوه منا ..؟
حبيب فلت بدرى من شيل الهم؟
ولا أم كبرها الدعا بالستر لضناها ؟
مصاريف أخواتى الصغيرين
والشغل ..؟
حسرة على زمن العوانس
ميكروب بيشيله شعاع الشمس يوماتى
مع البرفان السايح فى عرق الشهوة
…………………..
ونس
باسمع صوتك فى التليفون باتألم
ولا يمكن أقدر أعزمك عندى
إلا أما ألملم نزواتي وفرحي
واختشى على دمى
أخبى صور جوازى ، وريحة قمصان نومى الدايبة
وأرتب سريرى الدافى
ما كلمكيش عن شكل الميه فوق جسمى
بلور يتنطط م الفرحة
يطب ساكت لما يقرب من شكل الدمعة
مقدرش أوصفلك .. متعه حلفانه اليمين
احساسى وأنا ملزومة منه ..
الطلاق اللى باخافه .. انت بتشتهيه
دخلته عليه يحضنى بإيد وف إيده التانيه كيس فاكهة
السهرة سوى قصاد التليفزيون
فرك الصوابع آخر الشهر م المصروف
شيل الهم اللى بودنين
والخناقات .. اللى أحلى ما فيها صوتين ..
بيونسوا بعض
………………….
عقر بيت
واقف بيدن لحد القطر ما فات على عرفه الشايخ
واتفرفط ريشه على السكه والدم حمّانى
طالتنى شوية خضه
والمدفون تحت الرجلين لساه واقف
والبت بتدّكر
رغم أنها حلت ضفاير أمها ف قبرها
دخلت تربه أبوها .. وعليت نومته
غيرت الطوبة اللى مبشبشها الدود
سفّت ملح العود ، خرّمت العروسة الورق
حموها بدم السحلية و خزأولها عين بومة عانس
حدفوها من الدور التانى ،لفلفوها بخيوط عنكبوت أعمى
وديل حصان مكسح
ولساها عقر بيت
بتقصر وتكش ووشها يكرمش
وبيرجع بيها العمر ..
لأدااااااااام
………………..
دكر النحل
ما سألتيش نفسى كتير
ولا قلت الله يكون ف عون
عشت اللحظة ألملم ف تمنياتي
يلألأوا فى الضلمة ويتوضوا بسكون الليل
وشعر طويل ع الأكتاف
بيشب ويبوس العود .. ينشع طراوة
أما براوة بصحيح
على دى مرايا مقسمانى لروحين
أرضى بغزلها وعشقها ليه
ولا ابقى ذى دكر النحل
يلهث ورا الملكة ويموت فدا نص ساعة .. جواز
……………..
فرز تانى
قعدة نضارتى فوق الكمودينو جنب السرير بتقول أنى رئيس تحرير فرز تانى
عملت لى إمضا واخترت بنط لإسمى ع الترويسة
ومطيت شفايفى ..ورجليا
.. مافيش قانون بيمنع القصيرين من المناصب
حفظتلى كلمتين من مصطلحات مش متركبه مع بعضها
مرة والتانية هأعرف أتمطع فى الكرسى الورانى ف عربية سودا
أقعد أعد أعمدة النور
وأرمى كل اللى فات على أقرب رصيف
بشياكة أرخى نضارتى تحت عنيا بكام سنتى بكل ألاطة
ويفضل الشمبر معلم فى وشى دليل على ثقافتى
اللى نايمة بكل هدوء على الكمودينو
جنب السرير
……………………….
شاى بلبن
قبضة إيدك على كوباية الشاى باللبن بتقول أن مزاجك عالى
صوت الشفطة بيزغد ف ودانك
غمضى واشفطى بصوت مسموع
نخاشيشك تعمر
وكأنها صرخة رضيع مخلوطة بسربعة أم متأخرة على شغلها
ومزود له الحليب اللى قاطع من ساعات انتظاره الطويلة
شفطة طويلة وصوت البلعة هيشرخ زورك
تصحى على عضعضة المشط ف راسك من إيد ستك
وتصدى ودنك م المحاذير إياها
تانى وتالت شفطة ومازهقتيش من سمعان الكلام
والخوف م الصوت العالى
والبرد الى مخيش ف ضلوعك
رغم نومتك الكئيبة ف وش الحيط جنب أمك
مش هو ده النفس اللى كرهتيه
واللى بتعملى نسياه
مع كوباية الشاى باللبن
………………….
ذكرى
زمان عدت مابنا نسمة هوا
جبدتنى نعرق فواصلها
إزاى سمحنا أحنا النهاردة للناس تعدى وسطنا
العربيات .. شنط السفر
كفين كل اللى بينهم انصهار
مزمن…
………….
أبويا
بحب الموز
قد ما بأكره أبويا تمام
ضعيف وخبيث وحنين
وبحب النور النيلون
وريحة المية على سلم ممسوح
كلام الناس اللت وعجن
وبطاطا سخنه ف عز السقعة فى ليل بردان
وبحب الضلمة
لكنى باخاف …
لو حد حضنى بجد
…………………
كده برضه
سايب شراباتك متكلفتين واخدين جنب فى الدرج ونازلين عويل
على ريحتك اللى غابت
وكوبياتك من يوم ما اتكفوا على وشهم ما اتعدلوش
فضلوا شويه مطرطقين ودانهم مستنين ايديك تملصهم بمزاج
مع شفطة شاى مظبوط وتمام …وبعدين هدهم الانتظار
غطا علبه البن مردوم تراب
خايفه أنفخه ليبقى فال وحش
عقب سيجارتك سيباه ذى ماهو فى طفاية الحمام
صحيح أيه أخبار الحمام ؟
لساه مظبوط بسيجارة وفنجان قهوة الصبح ؟
يومك بقى إزاى ؟
15 يوم يا كافر !
بأسمع صوتك بالتيله
وأشوف صورة مشاركينى فيها كل اللى ع الفيس
حرام ..
ده ربنا ما بيغبش لحظة عن عباده
وأنت قدرت تكملهم 15
