1
دخول
ماكنش ممكن
التفكير ف المشاعر السرية بدون رقيب على ضميرى
وهنا بالقى الضمير
بيتخلى عن فكرة إنه الرقيب
أو المعادل الموضوعى للإله
ويسيب الرقابة تشد الحزام على روحى لدرجة الخنق
أقطع الكتابة
وأغض البصر عن المرارة اللى بتحصلى ساعتها
واجمع خريطة ممكنة لكتابة نص عادل
ما فيهوش
خدش لحياء التفكير
ولا الدخول لأماكن محرمة ف النفس
2
كشف
باطرح أفكارى للمناورة
واثبت أقدامي على نقاط الاختلاف بهدوء
ولما تحين لحظة الصيد
يحصل الكشف
يخرج الحجاج بن يوسف ف بيان تليفزيونى
يبرأ معاوية
ويدخل السكينة ف قلب الزبير
بتجديد الكسوة ومد السقاية
و يخمد فتنة النجف
بإقامة الحد و ارساء مبدأ الحاكمية
ويستكمل الحجاج البيان
ان
من عدل الخليفة
تم
الغاء تفتيش الحجاج
ومنع حظر التجوال ف الكعبة
واتاحة الحريات جميعا
وانهى البيان
باعلان
نجاح اغانى الفيديو كليب!
3
تداعيات الفرجة فتح
نفسى مش امارة بالسوء
ولا عقلى حكيم
سايبة لك الباب موارب
لحالة الانتظار اللى بتحطنى فيها باستمرار
و اعتقادك ان ده ضمان اكيد لاستمرار العلاقة
بامد لك الحبل ع الغارب وولى ضهرى لانتظار خنجرك الحجازى
يبقع قميصى بدم عثمان
و صوابع نائلة الحايرة بالشهادة
تداعب شعرى بحنية
هنا نفسى أمارة بالسوء
وخروجى
ح يكون من غير طواف
أو سعى لإنجاز
صورة مستعارة
ــــــــــــــــــــــــــــــــــ
من ديوان “سوبر ماركت” يصدر قريباً عن هيئة الكتاب
خاص الكتابة
