إبراهيم عرفات
تقفز الأفكار أحياناً إلى رؤوسنا دون مقدمات. وقد قفزت فكرة هذه الرباعيات إلى ذهني فجأة. كانت البداية رباعية كتبتها في لحظة تصلب ليلية. رجل ناهز الستين يجلس قبيل نومه مستغرقاً في التفكير في كل شيء وضده. فجأة توقف تفكيره. رأى كل المخارج سدت أمامه. أحبطت آماله وأخفقت رهاناته. استبد به القلق. تملكه خوف عنيد على الغد والإنسان والوطن والعالم. نالت منه ضربات اليأس وهو يرى كل شيء يسوء ولا يتحسن. دخل في غيبوبة وهو يقظان. وفجأة أمسك بقلم وراح يهذي به على الورق.
كان قد اعتاد أن يهذي في الليل رسماً. وفي أحيان أخرى كان يهذي بالموسيقى. أما في تلك الليلة فقد انزلق قلمه دون اختيار منه إلي الشعر، وتحديداً إلى نوع يُعرف في العامية المصرية بالرباعيات. استبدل ليلتها الأشكال التي اعتاد أن يرسمها والموسيقى التي كان يتخيلها بالكلمات.
كلمات قليلة كتبها ثم خلد إلى النوم. ولما أشرق صباح اليوم التالي نظر فيها فوجدها مسكونة بدفق من تراث صلاح جاهين، ذلك العملاق الحزين الذي لا يبارى والذي توج المصريين والعرب بمنتج ثقافي راق ورقيق من علاماته المنيرة رباعياته الشهيرة.
في جنح تلك الليلة وضعت هذياني في بضع كلمات كتبتها على سطر. أتبعتها بكلمات على سطر تال. ثم أضفت إليها كلمات جديدة على سطر ثالث ثم أنهيتها بكلمات على سطر رابع. هكذا ولدت أول رباعية. شعرت بعدها براحة لا أعرف سببها. ربما لأني أفرغت شحنة مشاعر محبوسة كانت تؤلمني. أعجبتني الطريقة فكان أن اكتشفت أن تلك الرباعيات تستطيع أن تخفف، ولو بقدر، من اللوعات.
رحت أكرر التجربة مع كل فكرة عنّت لي. راكمت عدداً معقولاً منها، وجدت أنها تجسد هموماً وتناشد أمالاً قد لا تخصني وحدي وإنما قد تعبر أيضاً عن أرق يعيشه كثير من الناس.
وإذا كانت للشعر قوالب صارمة وأحكام لازمة، حتى لو صيغ بالعامية، إلا أن منبعه دائماً هو الشعور. والشعور يرتقي بلا جدال لو عاش بالشعر وللشعر ومع الشعر حتى لو وقع من يكتبه أحياناً في مخالفة لبعض القواعد والأحكام الصارمة التي يتقيد بها أساطين الكلمة المنغمة. الشعر له معمار دقيق تبرز فيه قيمة الأفكار والأوزان والأنغام. لكن أهم ما في ذلك اللون البديع من الكتابة مساحة الحرية الواسعة التي يتيحها للشعور فتتركه حرا يقود الشعر حتى لو جافى عن غير قصد بعض قواعده.
هكذا ولدت تلك الوشوشات الشعرية. بدأت كوصفة علاج ذاتية وظفت فيها الكتابة بشكل آخر غير الذي اعتدت عليه. فالكتابة، بكل صورها، تحرر النفس من ثقل الحقيقة ومرارة التجارب. لكن الشعر، وبالتحديد الرباعيات، يخوض معركة التحرير بسرعة فائقة وفعالية أكبر. الرباعية ليست إلا ما قل ودل. تلخص الكون في حبة وتضع المجرة في جرة. توشوش في الأذن عن بعض ما يشوش الرأس. وكان الإنسان موضوع هذه الرباعيات. طبيعته وقدره. حظه ومصيره. قوته وضعفه. غدره ومكره. عناده واستبداده. كفاحه وفشله. حياته وموته. حيرته وتناقضه. مكانه وزمانه. مشاعره ومخاوفه وهواجسه الملازمة لوجوده.
كلمة أخيرة أخصصها للشكر، أوجهها إلى الدكتور عمّار علي حسن. ولن أزيد في بيان لماذا أخصه بها إلا لأنه عمّار علي حسن. فإليكم وشوشاتي.
إبراهيم عرفات
(1)
في صوت غريب جاي من زحل
يمكن يكون الكون زعل
لأ ما اعتقدش
الكون بدأ يكتب زجل
(2)
تيجي يا بن آدم من عدم تمشي لمصير
وإياك العجب..كله متقرر تقرير
جسمك حيرجع للعدم وروحك
تستنى تقرير المصير
(3)
الدنيا مخزن متعبي بالأحزان
كل ما تنقص يرجع يعبي كمان
هي كدا الدنيـــــــــــــــا
هو كدا الإنسان
(4)
كان نفسك الزمن يتجمد
اصحى..دا كل يوم يتجدد
الزمن مفتوح
كل ما يخلص يرجع ويتمدد
(5)
الدنيا سبق كله قلق
واحد وقع وواحد لحق
احترت ليه
كله مكتوب ع الورق
(6)
رسمت وردة فوقيها عصفورة
وحلمت كمان ببيت وسنيورة
سنتين وعشرة
ولسه آمالي مقهورة
(7)
نتولد يزغرطو
ندخل قبورنا يعيطو
الحياة والموت كدا
الاتنين مش بيتظبطو
(8)
أنا والزمن مع بعض بنسافر
أمشي وراه أسكت وأقول حاضر
أشيله جوايا اتحول إلى ثاير
معرفشي مالي راسي أو حاير
(9)
يا أمّا قول لي حنشرب مي؟
بصت ف عينه وعينه فيها ضي
بدري عليك الشيلة
متستعجلش انت لسه جاي
(10)
مفيش عنوان للفشل أوضح من الإنسان
سوا الجبال بالأرض حول مسار وديان
لكنه مش مبسوط
بيعبد المادة ويبعد الإيمان
(11)
ليه يا ربي خلقت لي قفا
كفوف بتنزل عليه تدور ع الدفا
من كتر غلبي
قولت للبيولوجي كفى
(12)
أعصابي ع المحك
الدنيا عك ف عك
مش قادر أصبر
الصبر محل شك
(13)
مسكت القلم صرخ سيبني
من امتى كلمة غيرت..جاوبني
مبقيتش عارف
كرهني القلم ولا حاببني؟
(14)
النخلة دي تملي تطرح بلح
واختها جنبها متعرفشي فرح
هي الدنيا كدا
واحد ينبسط وواحد يندبح
(15)
إزاي تبني العدالة
والناس غريزتها بطالة
طول عمرهم يظلموا
لحد ما تجيهم إزالة
(16)
تلقاه ع البيبان وع الأغصان
تحت الشبابيك وع الحيطان
الشيطان فكرة
قتلتها بس نخبة من الشجعان
(17)
يا وتر العود تنضرب متقولشي آي
صوتك بيشجي رايح وجاي
جبت صبرك منين؟
علمني أنا لسه ني
(18)
الدنيا خانقة معانا وضيقة
وواسعة على غيرنا قوي ومبهوقة
انت من دول ولا دول؟
ميهمش..الاتنين مهزأة
(19)
مرايتي يا مرايتي مرايتي يا مرايا
ما انتيش حتة إزاز أو كسر وشظايا
يكفيني أبص لك
فأعرف حقيقتي وبلاوي جوايا
(20)
وشوشت الودع يا ابن آدم سمعت قال لك إيه؟
جيت الحياة صدفة طب كنت جيتها ليه
الأمر واللي فيه
حيوان منوي وبويضة رموك هنا للتيه
(21)
سرحان ليه يا اسماعين باينك شيلت هم؟
العالم يا اسماعين معدشي عنده دم
مليان قلوب سودا
وناس زي الافاعي بيخرج منها سم
(22)
طلعت يوم القرافة طلعت عليا وحوش
أجسامها عضم ف عضم والراس عليها وشوش
عايشين دول ولا ماتوا؟
بس إيه يفرق..الاتنين مبيفرقوش
(23)
بنمشي ليه بالمقلوب
ونخبي ليه سر القلوب
حقود يبتسم لك تسأل
يقولوا هو كدا الأسلوب
(24)
حبست دموعها النرجسة
كانت عيشتها مؤنسة
ليه صدقتهم؟
خلوا رايتها منكسة
(25)
يا اللي سكنت قصور
ما سكنتها إلا لقصور
الكل عارفك
حقك تسكن القبور
(26)
طلعت سلالم المجد صاروخ
وفجأة بدأت أتعب وأدوخ
جابو لي كرسي ارتاح
أتاريهم وقعوني..الكرسي كله شروخ
(27)
هما كدا لحمك ودمك
يتعبوك ويزيدوا همك
تقيد صوابعك
يواصلوا ذمك
(28)
ضربوك وطلبوا متقولش أي
ووعدونا بكرة في حلو جاي
الكدب عادي ف دمهم
يقتلوا ببرود وبياكلوا اللحم ني
(29)
العدل في الكون اتظلم
بريء يسموه متهم!
وجاني يبنو له هرم!
العدل طالب يتعدم
(30)
جرح الحجر ايدي لكن سبق وشكاني
قال إيه وشه انجرح من ايدي وكيعاني
سمع القاضي الشهود وأعلن الأحكام
إنت يا حجر لئيم وبوش إنساني
(31)
يتيم الأب والأم تربية خالته
الكون واساه وعيط على حالته
إلا ابن آدم
عرف بيتمه فكسر له حصالته
(32)
تحط فاكهة في الخلاط
تلقاها قمة في النشاط
ولو ابن آدم ويا أخوه
يشترط ألف اشتراط
(33)
قالوا الصديق في الضيق
ليه أصدقائي أنا قمة ف التضييق
يكونشي حظي نحس
ولا الزمن فجأة غيّر معنى الصديق
(34)
بتخاف يا ليل مننا ع الكواكب والنجوم
وزاد ضيقك قوي وشيلت بسببنا هموم
شوفت البشر حطوا رجل هناك
بعد ما خلوا الأرض بيت مهدوم
(35)
“الدم عمره ما يبقى ميه”
كلام يقوله الحرامية
أدي قريبك وآكل نصيبك
ويقول تمام ومية مية
(36)
صاحب نفسك لو كتم الناس على نفسك
فيهم حقود ومنهم حسود واللي ينافسك
وواحد يقرفك وغيره يعاكسك
وواحد تحسه شيطان ولابسك
(37)
م الابتدائي للجامعة عشر سنوات
ذاكرنا فيها كتير وحفظنا معلومات
ولو يسألونا النهاردة عن أتفه بديهيات
نسرح وننسى ونجري ونسلم الرايات
(38)
حتكوي لبسك لوشوش مكرمشة
يا ريت يفردوها ويبطلوا رِشا
المكرمش مش حرام
الحرام الفاحشة
(39)
يا عم “سيد” مين سماك…دا انت مرمطون
غلطة وعملها أبويا دوّت في كل الكون
اسمي مش راكب
لكن سيبوه أرجوكم خلوني أعيش في سكون
(40)
اسمع كلامي أنا..اللبس دا لابق لك
وصدقني أنا..الفكر دا لايق لك
يا بـــا كفاية نصايح
عقلي ماهو أقل من عقلك
(41)
غريب أمرك يا حارس..يجي تعلب وتتاوب
وكلب الحراسة الوفي تبرم له ف الشارب
زاد شكي بجد فيك
يا خوفي تكون ع الغدر متصاحب
(42)
قنديل البحر لسعته ليها حل
حط على جلدك بس شوية خل
ولسع البشر؟
آآه…سم اتنقع في الغل
(43)
إزاي يا معدم تتجرأ على أسيادك
دول هاي لايف وكريمة ف بلادك
طاب هاتو لقمة
أديك بيّنت أحقادك
(44)
نتفوا ريشك وقالوا طير
ولقمتك شافوها كتير
قلت حتسافر
إزاي وإنت مش بتطير؟
(45)
قلبت معايا بغم بعد ما عديت الفحص
كل الورق بيقول إني أكيد الشخص
وإني حأمسك وظيفة أقنص منها قنص
أتاريهم زحلقوني..إخص وألف إخص
(46)
ارحموا عزيز قوم ذل
ارحموه فكوه من الغل
لو كان صعبان عليكم
روحوا حاربوا المستغل
(47)
ياللي رميت الواد في عينه برصاصة
تهيج لو شوفت إسمك مكتوب على قصاصة
احنا أكيد السبب
كنت بتخشانا وصفوفنا متراصة
(48)
واخد ف نفسك قلم وماشي تتقمع
وانت شوية عضم اتلفو بمشمع
فهمك على قده
قوم بص على وشك البؤس متجمع
(49)
الواد ابن طين الأرض اتجوز خواجاية
خدها ترطن لأهله بلكنة وغواية
لو بس يرجع لأصله
يمكن يلقي اللي عمله يرقى لجناية
(50)
طول عمرك يا إبن آدم بتدور ع الخلاص
طول عمرك يا بن آدم نفسك في القصاص
بس القهر غيرك
حتحاول تاني ولا خلاص؟
(51)
تعبت م اللف والتلميح
نفسي أكتب بشكل صريح
وأفكر براحتي واسابق الريح
بس الكتابة بتنتهي تدبيح
(52)
أهون عليا أحط إيدي في قرص الشمس
ولا أسمعشي عنك كلمة ولو بالهمس
ولا أشوفش حاجة تخدشك
ولو كانت نسمة بتلمس لمس
(53)
عايز تمشّي الكون على كيفك؟
من امتى الكون رهن لتصاريفك؟
احلم براحتك وكيف كيفك
لا أنتَ وليفه ولا هو كمان وليفك
(54)
بين عضمة والتانية مسافة للغضروف
واحنا عايزين مسافة يمكن تحصل ظروف
ليه نقرب قوي؟
الحل في المسافة هي الدوا الموصوف
(55)
ربطت لساني وقلت السكوت أحسن
بس ما قدرتش مع إن الطناش أضمن
قلت ما بدها
كلمتي ف وشهم مهما يكون أهون
(56)
يا مشمشة الشمس حامية نشّفت ريقك
لونك غمق ودا كله من ضيقك
زيحي همك ولا يهمك
عرفتِ خلاص عدوك من صديقك
(57)
يا حلوة فوق العجلة بدلي برجليك
مع كل لفة الدنيا حتضحك ليك
متوقفيش اللف تبقي ف المضمون
حقيقة يعرفها كل اللي جم قبليك
(58)
ابني لنا يا بــــا بيت على الضفة
فرح عيالك قبل ما تتوفى
البيت أمان وفيه حنتدفا
خاف شوية دا أنت على الحافة
(59)
يا كاسر البيضة لو لقيت صفارين
أخوك ماكلش يمكن بقى له يومين
خلي صفار يسندك
والتاني للمساكين
(60)
يا موت كفاية زودتها شوية
هو انت واخد فاتح للشهية؟
خفف علينا
خدني أنا وسيب البقية
(61)
حبست دموعها في الفازة
وردة جميلة في إزازة
كسروا بخاطرها
حطوها سجن بلا عازة
(62)
حأسيب نمرهم على التليفون
حقيقي ماتوا وراحوا للسكون
بس مش حأمسحها
دول عرفوني وزننا ف الكون
(63)
لو سكت الناس إلزم السكوت
ولو نطقوا اتكلم بعلو الصوت
واوعى تنسى
الناس بتموت وانت كمان حتموت
(64)
لما حأموت راح تبكوا شوية وتنسوني
وبعد يومين حتيجوا جنبي تأنسوني
المخلصين كدا
لا أبكيهم ولا يبكوني
(65)
يا بن آدم بتتعلم وتدرس
تعافر تدوس تجري وتهرس
ولو حان الأجل
تسكت وتخرس
(66)
خلاص انتهت الزيارة خلاص قربت أسافر
الرحلة جابت آخرها وظهرت كل البوادر
أمراض كتيرة صابتني ملهاش أول واخر
واحد قالها بصراحة..ودوه على المقابر
(67)
يا عقرب الثواني خفف لفك شوية
ما عدِتشي بجد قادرة تركز معاك عنيا
عمري الباقي ثواني
فهدّي اللف حبة وبلاش تضحك عليا
(68)
فكرت في الفناء؟
سرحت في الهباء؟
لو يشبه الدنيا يبقى برضه ابتلاء
الاتنين يبدو قدر مفيش منه اختباء
(69)
تعبت مرة فنمت ع الدكة
شافني الطبيب وفحص لي أبو تكة
قال لي البطين تعبان والأذين شرحه
قلت خلاص مليش في الحياة سكة
(70)
مستقبلنا بجد واعد مع الأموات
نرتاح معاهم بقى م الظلم والبكوات
يالا خدوني قوام
بالذمة في حلاوة أجمل م الممات؟
(71)
الموت بيحصد حصد
مش صدفة دا عن قصد
حقيقة زي الشمس
ومرصودة لينا رصد
(72)
إيه اللي جابك عندنا يا غريب
شكلك مخيف وشك مريب
يا اخوانا سواح
وموتي هنا يمكن نصيب
(73)
بأفضل السكوت
أتكلم ليه وأخرها موت
حقيقة واضحة
الكلام زينا بيتولد ويموت
(74)
تموت يحسبوك مرحوم
وامبارح قالوا يا مجحوم
الناس كدا
طبعها مذموم
(75)
يا ربي سرك عظيم وكبير
وأنا إنسان يعني ذنوبي كتير
داخل على آخرة
أنا في وضع خطير
(76)
ندخل قبورنا ونبدأ رحلة النسيان
تحت التراب مين يحسبك إنسان
وإيه بس يفرق؟
في الدنيا برضه محسبونيش إنسان
(77)
طلعت الجبل أراجع الأفكار
ادحرجت فوق راسي كومة م الأحجار
معرفتش أعمل إيه
فضلت متسمر وأنا محتار
(78)
بافرح لما أشوفك بتسجد
ونفسي فعلاً تكون بتقصد
عارف ليه؟
بعد الصلاة ألقاك بتحقد
(79)
كنا زمان نشرب من القلة
وفوق سطحنا بنخزن الجلة
دار الزمن ونسينا
بدلنا قشرتنا فعيشنا في مذلة
(80)
تعيش حياتك كل يوم ملتاع
تزرع البهجة تحصد الأوجاع
عايز النصيحة
الدنيا بحالها سقط متاع
(81)
ضربت خمسة في ستة مطلعوش تلاتين
كل الحساب اللي عرفته فقد البراهين
راجل بيحلف
تفتكره راهب مع إنه بيسب الدين
(82)
شفت السمك بيطير والحمام بيعوم
يمكن حلمت كتير وأنا ف عز النوم
قرصت نفسي طلعت صاحي
لقيت الصح بقى غلط في عرف القوم
(83)
فاكر يا محمدين شارعنا من سنتين؟
مرت عليه نسمة صحت الساكنين
قلنا النهار أهو طل
طلع النهار ميت وطلعوا ميتين
(84)
أديك يا عم حباجة سويت لنا طبخة
خدت مقاديرها من أرضنا السبخة
مين بس قال ينعمل م الفسيخ شربات
هو ف حياتنا حاجة أكتر من اللبخة
(85)
في بلاد جمالها يشدك وغيرها بقسوة تشدك
وبلاد تهديك إليها وبلاد تانية تهدك
إنت وحظك يا صاحبي
إما بلدك يجاوبك أو تلاقيه يصدك
(86)
الشرق الأوسط دا مبيشبعشي حرب؟
شعوبه كل يوم نازلة ف بعض ضرب
لما التاريخ ابتدا اتراشقوا بحجارة
الوقت طيرانهم بيقصف سرب سرب
(87)
يا بقرة ليه خليتيهم يحلبوا ضروعك؟
يا بقرة دول ياما مصمصوا ضلوعك
ابعدي عنهم
أنتِ مش قدهم ولا هما كمان بتوعك
(88)
الطبقة دي هاي لايف تملّي في فرنسا
والطبقة دي كحيتي قاعدة هنا مآنسة
لكن شبه بعضهم
في ناس بالأمر ترغي وناس بالأمر خرسا
(89)
بلاك لايفز ماتر
بس احنا كمان في خطر
أنا عربي ساكني خوف
ولو من زخة مطر
(90)
آه يا بلد النونو مات لما اتولد
ينزل على جبينه مكتوب الجلد
يعيش ضعيف ويموت ضعيف
حظه كدا هم وكمد
(91)
يا مطلوبين للشعب يلاقيكو الشعب فين؟
أوراقكو في المحاكم كاملين متستفين
بس الخبر اليقين
قوانينكو مش عدالة دي شغل مجرمين
(92)
يا عربي كترت مشاكلك بقيت ابن أزمة قديمة
كان إيه في الكون لزومك وانت تمثيل وسيما
يا تشوف لك حل جذري
أو استنى الضياع ونهايتك الأليمة
(93)
الوطن للجميع مش هبرة وغنايم
تقول بس لمين؟ هتسمّع النايم!؟
يا ما مال اتنهب وراح على عزايم
وحيفضل يتنهب طول ما القانون نايم
(94)
يقولوا مذاهب يقولوا طوائف
طب وماله ما الكل عارف
ربك خلقنا كما الزهور
لوحة وفيها كل اللطايف
(95)
بين الجبل والجبل شايفين هناك ممر
عدت منه جيوش داقت علقم ومر
كل ما يمر غازي يجي عندها وينشل
أكيد جبال بلادنا شايلة جواها سر
(96)
البيه دا إيه…إسلام سياسي؟
والبيه دا إيه…تيار أساسي؟
طب طز فيكو
كلمة كدا وطقت في راسي
(97)
اتقطع النور والأمة طالعة على السلم
أشوفها في العتمة أتعذب وأتألم
طب أعمل إيه؟
أفضل كدا مبلم؟
(98)
عجيب أمرها مع أهلها في كل عصر
يتعصروا جوا وبرة بتتعصر عصر
ودا وضع عام؟
ولا حالة على سبيل الحصر؟
(99)
حارة جمب حارتنا كترت فيها الفلوس
اتغيرت واتطورت وهاجرت إليها نفوس
وفلوسها؟
جات عندنا وخلت حياتنا كابوس
(100)
حضارة دي ولا احتضار؟
لا بنربط ولا بنفك حمار
الحضارة عقل
لا هي كلام ولا رص أحجار
