قريب جدًا

موقع الكتابة الثقافي
فيسبوك
تويتر
واتس أب
تيليجرام

إبراهيم عادل

..هييجي جيل جديد ...

متحقق قوي ... "من نفســه"..

لا يهمه كتاب، ولا ندوة، ولا نشر، ولا ديوان ..

ولا تدوين !!

لا بيكتب (نوتس) على الفيس بوك ..

ولا يمشي يقول الشعر ف كل مكان!!

قريــب قـوي ... خلااااص ..

هيجي جيل ..

يقول الشعر لنفسه، ويسمعه جوَّاه ..

دواوينه وكتبه ..كلها في الهـوا ..

في الهوا بجد ..

هتلاقيها تسـد الشمس ..لما تطلع ..

ويمشي بيـها السحـاب ..

تنزل ع البـحـر زي المراكب ..

ومن غير شـراع !! ..

قريب قوي ..

هيبقى الشعر على ورق الفلوس ..

أبيـض ..مش زي الدولار ..

هتبقى كمان ..

الورقة اللي فيـها شعر أكتر ..

هيا الأغلى ..

قريب قوي ..

كل الناس ..كل النـاس ..

هتعرف تقدَّر الشعر .. وتحسـه كده ..

“كما أنزل”

من قلوب وأحاسيس كل الناس !

قريب قوووي …

هيستنغنى كل الشعراء دول ..

قصدي ..”كل النـاس” …

عن الورق .. وعن الأقلام …

وتبقى القصيدة .. زي الكلمة ..

بتتنقل ببصـة عين ..

و الرواية … بلمسـة إيـد!

قريب ..جــدًا ..

خلاااااص….

إحنا هننقرض !! ..

ويحنطونـا مع كتبنا وورقنا وأقلامنا ..

في الميادين العامة .. والمتاحف !

وبرضه النـاس مش هتصدق

إننا كنا بنكتب “شـعر” ..

ولا إن “رواية” ممكن تبقى ف ورق .. وكتاب !!

هتبقى حكايتنا دي “أساطير” ..

محدش تنبأ بيها غيري قبل كده !

وهنقول لهم (اللي فاضلين مننا يعني):

طب تصدقوا إن ماحدش كان بيقرا كتبنا دي

ولا حد كان بيعرفنـا أصلاً !!

وهنقول لهم كمان:

ياريتنا فضلنا “محنطين” ..زي الباقيين ..

على الأقل إنتو شايفينهم .. ومستغربين !

إنما إحنـا نعمل إيه ؟؟ ولا نقول إيه ؟!!

وغالبًا مش هييقتنعوا بكلامنا

بـس مش هيفتكرونا “مجانين”! ..

هيحسوا إننا مش قادرين نوصل لهم..

“نظرتنا للحيـاة” !!

ماعندناش (مـهارات توصيل) ..

 

يمكن شوية مننا ..

قريب قوي برضو ..

يقتنعوا بفكرتهم ، وياخذوا (كورسات) ..

في الميـة والهـوا ..

عشان يعرفوا يقولوا الشعر ..

فيوصل لكل الناس !!

ويسلموا على بعض ..

من غير “لمسـة إيـد” !!

 

 

 

خاص الكتابة

مقالات من نفس القسم

عبد الرازق الصغير
يتبعهم الغاوون
موقع الكتابة

قصيدتان

يتبعهم الغاوون
موقع الكتابة

ومضات:

فن تشكيلي
يتبعهم الغاوون
موقع الكتابة

في عناقي