خوف

موقع الكتابة الثقافي uncategorized 4
Share on facebook
فيسبوك
Share on twitter
تويتر
Share on whatsapp
واتس أب
Share on telegram
تيليجرام

محمد خير

حداشر محطة مترو

ضوء شاحب

وشوش متنطورة

 بتزود احساسك بالمسافة

كان الطريق

أطول من قدرة أفكارك على التسلية

وبين كتفك وشعرَها :

حلم متأجل

ماكنتش عارف

إن الخبرة

بتقتل الشعور بالتجربة

وان الانتظار

أصعب

من أي شئ ينكتب عنه ..

 

كام واحد في اللحظه دي

كان بيفكر في هند ؟

يمكن كانت نايمه

أو بتكتب غنوة

أو حاسه بالذنب

لأنها علمتك تحلم

وانت الوحيد

خايف من كتابة قصيدة

مستنينها اصحابك

دنياك بتقع

مع نزلة قلمك ع الورق

ونزولك سلم المستشفى

سايب ابوك فيها

أكيد مكنتش مملوك

خايف من بنادق الفرنجة

لكنك زيه :

خايف من ضياع وطن

مش بتاعك ..

نفس الخوف

في عيون شاب

 قاعد معاك في القطر

هيموت

بعد ساعه من الوصول

تحت عربيه

 ملهاش ذنب

في استعجال نهايته

كالعاده

توقعك هيخيب

بعد دقايق من تأكدك منه

النهارده

هتروح بدري

الليله دي

ماتنفعش للتفكير في الحب

ولا استكمال حياة

أجمل من إنها تكون

حقيقيه

أكتوبر 1996

ــــــــــــــــــــــــــــــــــــــــــــــ

من ديوان ليل خارجي

 

عودة إلى الملف

 

مقالات من نفس القسم