مامتى هى أطيب واحدة فى العالم وده رأيي، هى أم هايلة وشخصية جميلة، وكل اللى بيقابلها بيحبها وبيعرف كده.
أما بالنسبة لشغلها فطبعا أنا ما عرفش كتير قوى عنه لكن أعرف أنها كاتبة هايلة، وصحفية شاطرة، وان هى بتعمل أى شغل بيجيلها كويس.
أنا لسه فاكرة المرة اللى سافرت معاها لبنان فى سفرية شغل، كانت أول مرة أسافر فيها مع ماما فى سفرية شغل.
قعدنا هناك فى فندق فيه كل الناس اللى مستضيفينهم فى المهرجان.
تالت يوم روحنا فيه الندوة بتاعة ماما، الندوة كانت مليانة كتاب ومثقفين وناس مهمة، وكلهم كانوا بيقولوا كلام كبير وغريب، وبالنسبة لى أنا مالوش معنى، حتى ماما كانت بتتكلم زيهم.
بعد الندوة روحنا لسهرة ماما كانت معزومة فيها ساعتها افتكرت انها هتبقى أحلى ومش رسمية زى الندوة، بس طلعت زي الندوة، كلهم كانوا مثقفين برضو وبيقولوا كلام ممل.
بس فى النهاية مشينا وروحنا الفندق، وباقى السفرية كلها كانت تحفة.
أنا وماما طول السفرية كل يوم كنا بنخرج نتفسح ونتعرف على بيروت، ولما وقت الندوة يقرب تودينى على الفندق تانى، وهناك بقعد اتفرج على التلفزيون.
الهدف من حكاية لبنان دى إن أنا صحيح مش بستلطف المهنة بتاعتها قوى، ولا الوسط الثقافى والكلام ده كله، لكن السفرية نفسها كانت جميلة عشان معاها.
